ကချင်ပြည်နယ် ဖားကန့်ကျောက်စိမ်းမှော်တွင် ၂၃ ရက္ နံနက်ပိုင်း အလုပ်လုပ်ချိန် ကုမ္ပဏီလုပ်ကွက်တစ်ခုထဲကို နွံကန်ပေါက်ကျမှုကြောင့် ကုမ္ပဏီအလုပ်သမား (၅၀)ကျော် နှင့် ကျောက်တူးစက်ယန္တရားများ နစ်မြုပ်သွားသည်ဟု ဆိုပါသည်။
မှော်ဝမ်းကလေးကျေးရွာအနီးရှိ ကျောက်စိမ်းတူးဖော်ရေးကုမ္ပဏီတွင် မြေဇာများ သွန်ချနေသည့် လုပ်ကွက်ဟောင်း နွံကန်ပေါက်ကျမူကြောင့် ကုမ္ပဏီဝန်ထမ်း (၅၄)ဦး၊ ဘတ်ဖိုးအစီး (၁၀)၊ ကားအစီး (၁၀)ကျော် နစ်မြုပ်သွားကြောင်း မှော်ဝမ်းကလေး အုပ်ချုပ်ရေးမှူးရုံးမှ တာဝန်ရှိသူများထံမှ သိရသည်။
“ပေါက်ကျသွားတဲ့ နွံကန်က အရမ်းနက်တော့ လူကတော့ ရှာဖို့ိမလွယ်တော့ဘူး။ မနက်ကတည်းက နာရေးအဖွဲ့တွေ၊ အုပ်ချုပ်ရေးဘက်ကရော ရှာဖွေရေးလုပ်နေကြတယ်။ ဒါပေမယ့် ခုချိန်ထိတော့ ဘာမှ ရှာမတွေ့သေးဘူး။ နွံကန်ပေါက်ကျတဲ့အချိန်က အလုပ်ချိန်ဖြစ်လို့ ရေမဆေးတွေမပါဘူး။ သူတို့ကုမ္မဏီက အလုပ်သမားတွေဘဲ ဖြစ်ဖို့များတယ်။“ ဟု မှော်ဝမ်းကလေး အုပ်ချုပ်ရေးမှူးရုံးမှ တာဝန်ရှိသူ တစ်ဦးကဆိုသည်။
အဆိုပါ နွံကန်သည် မြန်မာသူရ၊ ရွှေနဂါးကိုးကောင် နှင့် ကချင်အမျိုးသားဖွံ့ ဖြိုး တိုးတက်ရေး ကုမ္ပဏီ (KNDPC) တို့၏ လုပ်ကွက် ဟောင်းဖြစ်ကြောင်းသိရသည်။
“ဒါကတော့သူတို့ကုမ္မဏီက ပေါ့ဆမှုကြောင့်ဖြစ်သွားတာ ဟုတ်တယ်။ အရင်နှစ်ဟောင်းက မြေဇာလုပ်ကွက်ဟောင်းမှာ ရေတွေပြည့်နေတာကို ရေမစုတ်ထုတ်ဘဲနဲ့ အဲနေရာမှာ နေရာမှာ မြေဇာပုံချတဲ့အချိန်ကျတော့ နွံကန်ဖြစ်သွားတာ။ နစ်သွားတဲ့သူတွေတော့ ရှာဖို့မလွယ်လောက်တော့ဘူး။“ ဟု ဒေသခံတစ်ဦးဖြစ်သူ ကဆိုသည်။
ယခုပေါက်ကျသွားသည့် နွံကန်သည် အနက်ပေ ၄၀ခန့်ရှိပြီး မှော်ဝမ်းကလေးကျေးရွာနှင့် Nbala Hka (အင်ဘန်လခ)ကျေးရွာကြားတွင် တည်ရှိသည့် မှော်ဖြစ်သည်။