၂၇ ဧပြီ ၂၀၂၀
ရခိုင်ပြည်နယ်နှင့် ချင်းပြည်နယ်အတွင်း တာဝန်ထမ်းဆောင်နေသော တပ်မတော်သား အရာရှိ၊ စစ်သည်များအားလုံးကို အသိအမှတ်ပြု ချီးကျူးဂုဏ်ပြုပါကြောင်း နိုင်ငံတော်အတိုင်ပင်ခံပုဂ္ဂိုလ်ရုံး၏ ဧပြီ ၂၁ ရက်ထုတ်ပြန်ချက်နှင့် ပတ်သက်ပြီး ဝေဖန်မှုများစွာရှိနေသည်။ ယခုချိန်သည် မြန်မာနိုင်ငံ သာမက တစ်ကမ္ဘာလုံးတွင် Covid-19 ကူးစက်ရောဂါကို ကာကွယ်တိုက်ဖျက်နေချိန် တိုင်းရင်းသား ဒေသ ထိုးစစ် ပြုလုပ်နေမှုကို အားပေးနေသည်ဟု ပြောဆိုနေကြပါသည်။ ငြိမ်းချမ်းရေးကို အစဉ်တစိုက် စောင့်ကြည့် လေ့လာနေသူတွေဖြစ်တဲ့ နယ်ပယ်အလိုက်ကချင်ခေါင်းဆောင်တစ်ချို့ရဲ့ အမြင်သဘောတွေ ကို မေးမြန်း ထားပါတယ်။
သိက္ခာတော်ရ ဆရာ ခလမ်ဆမ်ဆွမ် (KBC ဥက္ကဌ)
အခုလို ကျွန်တော်တို့ တိုင်းရင်းသားတွေနေတဲ့ နေရာမှာ ဒီလို နှိပ်စက် ၊ပစ်သတ်မှုတွေကို ကောင်း ကောင်း မလေ့လာဘဲ စစ်ပွဲဖြစ်နေမှုအပေါ် ချီးကျူးဂုဏ်ပြုတယ် ဆိုတာ သူက သဘောတူပါဝင်ပေး တဲ့ဘက် ဖြစ်လာတယ်။ ပြည်သူတွေ မဲပေးတယ်ဆိုတာ စစ်အုပ်ချုပ်ရေးကို အလိုမရှိလို့ ပေးတာ ဟုတ်တယ်။ အခုသူက ဒီလို မြောက်ပေးတယ်ဆိုတာ သူ့အတွက် ၂၀၂၀ ရွေးကောက်ပွဲမှာ ကောင်းတဲ့ဘက်ကို ရောက်ဖို့ရန်တော့ ခက်ခဲလိမ့်မယ်လို့ ယူဆတယ်။
ဆရာမ ဒေါ်ခေါန်ဂျာ(Kachin Peace Network)
ခုလိုအချိန်မှာ ဘယ်စစ်တပ်မဆို စစ်ပွဲတွေ ရပ်ဆိုင်းပြီး Covid-19 ရောဂါကိုအားလုံးပူးပေါင်း ကူညီပြီး ကာကွယ်ရမယ့် အချိန်ဖြစ်တယ်။ ဒီလိုစစ်ပွဲတွေကြောင့် နစ်နာဆုံးရှုံးရတဲ့ ပြည်သူတွေဘက် ရပ်တည်ပြီး စစ်ပွဲငြိမ်းအောင် ပြောရမယ့် အစား လုပ်သင့်တဲ့ဘက်ကို လက်တွေ့မလုပ်ဘဲ တစ်ဖက်ကို စစ်ဖြစ်အောင် နှိုးဆော်အားပေးနေသလို ဖြစ်တဲ့အတွက် အဆင်မပြေဘူးလို့ ပြောချင်တယ်။
ဒူဝါ ကွမ်ကရောင်အောင်ခမ်း (Kachin State People’s Party ဒု ဥက္ကဌ)
ဒီအချိန်က ဘယ်လိုပဲဖြစ်ဖြစ် ငြိမ်းချမ်းရေးကို လုပ်ရမှာ။ အခုလိုစာထုတ်တာတွေ့ရတော့ ကျနော်တို့ လည်း အရမ်းအံ့သြတယ်။ ငြိမ်းချမ်းရေးက မလုပ်။ အခုဆို ကပ်ရောဂါကြောင့် ဘယ်အချိန် ဘာဖြစ်မလဲ ဆိုပြီး ရောဂါကာကွယ်ရေးတွေ လုပ်နေရတာ။ အခုလိုတွေ့ရတော့ မလုပ်သင့်တဲ့အရာလည်း ဖြစ်တယ်။
ဆရာ စားဂျီ (Kachin Development Networking Group)
အကြမ်းဖက်ဟုတ် မဟုတ်ဆိုတာ လူထုက သိပါတယ်။ ကိုယ့်လူမျိုးမတူတဲ့သူတွေကို အမျိုးမတူ ကိုယ့်ရန်သူ ဒို့ရန်သူ ဆိုတဲ့ နည်းနဲ့ မျက်စိပိတ်လုပ်တာက အထင်သေးတဲ့သဘောဖြစ်တယ်။ ကိုယ့်ယုံကြည်ချက်နှင့်ကိုယ် AA သာမက အခြားဘယ်တိုင်းရင်းသားမဆို ကိုယ့်လူမျိုးတွေအတွက် ရပ်တည်နေမှုသာဖြစ်တယ်။ လူမျိုးမတူ၊ ခံယူချက်မတူ၊ နိုင်ငံရေးဖြေရှင်းချက်မပေးဘဲ ရန်သူ၊ အကြမ်းဖက်တွေဆိုပြီး ရခိုင်တစ်ခုသာ မဟုတ်ဘဲအားလုံးကို ဒီလိုဘဲ ခေါ်တဲ့သဘောဖြစ်တယ်။
ကေအန်ဂျီ မှ ပေးပို့သည်။