၁၄ အောက်တိုဘာ ၂၀၂၁
ချင်းပြည်နယ်၊ ထန်တလန်မြို့အတွင်း စစ်ကောင်စီတပ်ဖွဲ့ဝင်များ တပ်စွဲထားပြီး ရိက္ခာသယ်ယူရန် ဝင်လာသော မော်တော်ယာဉ်တွေကို စစ်ကောင်စီတပ်ဖွဲ့က ပစ်ခတ်နေမှုကြောင့် ပြည်သူများ မြို့တွင်းကိုမဝင်ရဲကာ ရိက္ခာသယ်ယူခွင့်မရသောကြောင့် စစ်ဘေးရှောင်ပြည်သူများ နောက်လထဲတွင် စားနပ်ရိက္ခာပြတ်လတ်လာဖွယ် အခြေအနေကြုံနေရကြောင်း ထန်တလန်မြို့ စစ်ဘေးရှောင်ကူညီရေးအဖွဲ့က ပြောသည်။
“အရင်တုန်းကဆိုလို့ရင် ဒီရွာတွေမှာလည်း ထန်တလန်ကနေပြီး စားနပ်ရိက္ခာတွေကို သယ်ယူလာတာဆိုတော့ အခု ထန်တလန်မြို့ကို ဝင်လို့မရတဲ့အတွက်ကြောင့် ရိက္ခာပိုင်းမှာ နည်းနည်း အခက်အခဲရောက်နေတယ်။ ထန်တလန်မြို့ ရဲစခန်းနဲ့ တပ်ကုန်းမှာ တပ်စွဲထားတဲ့အခါကြတော့ ရွာတွေဖက်ဝင်လာတဲ့ ကားတွေ၊ ဆိုင်ကယ်တွေကို တစ်တခါတလေကြရင် သူတို့က ပစ်ကြတယ်ဆိုတော့ မြို့ထဲကို မဝင်ရဲကြတော့ဘူး၊ လူတွေလည်း ရွာထဲမှာ စစ်ရှောင်နေရတော့ စျေးတွေ၊ စျေးဆိုင်ကြီးတွွေလည်း မရှိတော့ဘူး။ ရိက္ခာနည်းနည်းတော့ရှိသေးတယ်၊ ရေရှည်အတွက်တော့ မလုံလောက်တော့ဘူး။ ဒီတလနေကြပြီဆိုတော့ နောက်တလလောက်ဆိုရင် ပြတ်လတ်တော့မှာ။” ဟု စစ်ဘေးရှောင်ကူညီရေးအဖွဲ့က ပြောသည်။
ပြီးခဲ့သည့် သြဂုတ်လ ၂၅ ရက်နောက်ပိုင်းကစပြီး မြို့တွင်းတိုက်ပွဲ ဖြစ်ပွားလာသည့်အပြင် စစ်ကောင်စီတပ်ဖွဲ့က လက်နက်ကြီးများဖြင့် ပစ်ခတ်ခဲ့ရာတွင် လူနေအိမ်များ ကျည်ထိပျက်စီးမှုနှင့် လက်နက်ကြီးပေါက်ကွဲမှုကြောင့် ဒေသခံပြည်သူများ သေဆုံးမှုရှိလာခဲ့ပြီးနောက် နေရပ်စွန့်ခွာကာ နီးစပ်ရာကျေးရွာများနှင့် အိန္ဒိယ-မြန်မာနယ်စပ်ကို စစ်ဘေးရှောင်နေထိုင်နေကြခြင်းဖြစ်သည်။
ထန်တလန်မြို့နယ် စစ်ဘေးရှောင်ကူညီရေးကော်မတီ၏ လက်ရှိ စစ်ဘေးရှောင်စာရင်းအရ တောင်ကြော ၅ ကြောမှ ကျေးရွာပေါင်း ၅၀ တွင်နေထိုင်ကြသော လူဦးရေ ခုနှစ်ထောင်ကျော်စာရင်းသာ ကောက်ယူရရှိပြီး ဆက်သွယ်ရေးအခက်အခဲကြောင့် ကျန်တောင်ကြော ၂ ခုမှ လူဦးရေစာရင်း ကောက်ယူရန်ကြိုးစားကြောင်းလည်း သိရသည်။
လက်ရှိတွင် စစ်ဘေးရှောင်နေရသည့် ထန်တလန်မြို့ဒေသခံများအနေဖြင့် စစ်ဘေးရှောင်နေရသည်မှာ တစ်လခန့်ရှိလာပြီဖြစ်သောကြောင့် ရိက္ခာနည်းပါးလာခြင်း၊ ကျေးရွာများတွင် ကိုဗစ်-၁၉ ပိုးကူးစက်မှု မြင့်တက်နေခြင်းနှင့် ကျန်းမာရေးအခက်အခဲများစွာ ကြုံတွေ့နေရခြင်းကြောင့် ကိုဗစ်ရောဂါကာကွယ်နိုင်မည့် ဆေးဝါးများ ထောက်ပံ့ကူညီမှုများလိုအပ်နေကြောင်းကိုလည်း စစ်ဘေးကော်မတီဝင်များထံမှ သိရသည်။
လူဦးရေတစ်သောင်းခန့်ရှိသည့် ထန်တလန်မြို့တွင် မြို့လုံးကျွတ်နီးပါး စစ်ဘေးရှောင်နေသည့်အတွက် မြို့ပြင်ရှိ မိဘမဲ့ဂေဟာတွင် လူနှစ်ဆယ်ဦးနှင့် မြို့လယ်တွင် သက်ကြီးရွယ်အိုအပါအဝင် မိသားစုဝင် ၃ ဦးသာကျန်ရှိကြောင်း သိရသည်။
ချင်းပြည်နယ်၊ ထန်တလန်မြို့တွင် ပြီးခဲ့သည့် စက်တင်ဘာလ ၁၈ ရက်က တိုက်ပွဲထပ်မံဖြစ်ပွားခဲ့ပြီး လက်နက်ကြီးဖြင့် ပစ်ခတ်မှုကြောင့် နေအိမ် ၁၉ လုံးခန့် မီးလောင်ပျက်ဆီးကာ မီးငြိမ်းရန်ကြိုးစားသူ ဓမ္မအမှုတော်ဆောင် အသတ်ခံခဲ့ရသောကြောင့် ယခုကဲ့သို့ နေရပ်စွန့်ခွာပြီး စစ်ဘေးရှောင်နေကြရခြင်းဖြစ်သည်။
KMG – ပေးပို့သည်။