၁၅ အောက်တိုဘာ ၂၀၂၁ ချင်းပြည်နယ်၊ ဟားခါးမြို့တွင် အောက်တိုဘာလ ၁၄ ရက် ည ၁၀ နာရီခွဲအချိန်က မြို့ထဲတွင်သေနတ်ပစ်သံများ ကြားရပြီးနောက် ဟားခါးမြို့ယဉ်ကျေးမှုပြတိုက် နောက်ဖက်တွင်ရှိသော ပြည်နယ် လ.ဝ.က ရုံးမီးလောင်ပြာကျသွားသည်ဟု သိရသည်။
၁၅ အောက်တိုဘာ ၂၀၂၁ မွန်ပြည်နယ်၊ ရေးမြို့နယ်၊ ခေါဇာမြို့ လမ်းခွဲအနီး ရေး-ထားဝယ်ကားလမ်းပေါ်ရှိ ကလော့ချောင်းတံတား (ဒေသ အခေါ် ပေ ၄၀ တံတား) ဗုံးခွဲဖျက်ဆီးခံရပြီးနောက် ယာဉ်ကြီးများ ဖြတ်သန်းသွားလာ၍ မရတော့ဘူးဟု ဒေသခံ များ က ပြောသည်။
၁၄ အောက်တိုဘာ ၂၀၂၁ ချင်းပြည်နယ်၊ ဟားခါး-ဖလမ်းကြားရှိ ထလန်ရောန်နားတွင် စခန်းချထားသည့် ဟားခါးဖက်သို့တက်မည့် စစ်ကောင်စီတပ်ဖွဲ့ကို ချင်းအမျိုးသားတပ်ဦး (CNA/CNF) နှင့် CDF ပူးပေါင်းတပ်ဖွဲ့တို့မှ တိုက်ခိုက်ခဲ့ကြောင်း သတင်းရရှိသည်။
၁၄ အောက်တိုဘာ ၂၀၂၁ ချင်းပြည်နယ်၊ ဖလမ်း-ဟားခါးလမ်းမပေါ်တွင်ရှိသော ထလန်ရောန်ရွာသစ်ရှိ လူနေအိမ် ၉ လုံးကို ယနေ့မနက် ၁၀ နာရီတွင် စစ်ကောင်စီတပ်ဖွဲ့ဝင်များက မီးရှို့ဖျက်စီးပြီး ယင်းရွာပတ်ဝန်းကျင်တွင် တိုက်ပွဲဖြစ်ပွားနေကြောင်း လည်း သိရသည်။
၁၄ အောက်တိုဘာ ၂၀၂၁ ချင်းပြည်နယ်တောင်ပိုင်း၊ မတူပီမြို့တွင် အောက်တိုဘာလ ၁၂ ရက်နေ့က စစ်ကောင်စီတပ်ဖွဲ့ဝင်များ ဒေသခံပြည်သူများကို တောင်ယာခြံထဲမသွားကြရန်နှင့် မတူပီမြို့ပတ်ဝန်းကျင်တွင် မြေမြုပ်ဗုံးထောင်ထား သည်ဟု လိုက်လံကြေညာနေခြင်းကြောင့် ဒေသခံများ အခက်တွေ့နေကြရသည်ဟု မတူပီမြု့ဒေသခံများထံက သိရသည်။
၁၄ အောက်တိုဘာ ၂၀၂၁ ချင်းပြည်နယ် ဟားခါးမြို့အထွက်တွင် ချင်းအမျိုသားတပ်ဦး (CNF/CNA)၊ CDF ပူးပေါင်းတပ်ဖွဲ့နှင့် အာဏာသိမ်းစစ်ကောင်စီတပ်အကြား တိုက်ပွဲများစတင်ဖြစ်ပွားလျက်ရှိနေပြီဖြစ်ကြောင်း သတင်းရရှိသည်။
အောက်တိုဘာလ ၁၄ရက်၊ ၂၀၂၁ခုနှစ် လာမည့် အောက်တိုဘာလ ၂၅ ရက်နေ့တွင် ပြုလုပ်မည့် အာဆီယံ ထိပ်သီးအစည်းအဝေးပွဲကို စစ်ကောင်စီ ခေါင်းဆောင် မင်းအောင်လှိုင်းကို တက်ရောက်ခွင့် မပေးရန် အရပ်ဖက်အဖွဲ့အစည်းပေါင်း (၅၂) ဖွဲ့က အောက်တိုဘာလ ၁၃ ရက်နေ့ ရက်စွဲဖြင့် အာဆီယံ ခေါင်းဆောင်များကို အိတ်ဖွင့်ပေးစာပေးပို့ ကန့်ကွက် တောင်းဆိုခဲ့ကြသည်။
၁၄ အောက်တိုဘာ ၂၀၂၁ ချင်းပြည်နယ်၊ ထန်တလန်မြို့အတွင်း စစ်ကောင်စီတပ်ဖွဲ့ဝင်များ တပ်စွဲထားပြီး ရိက္ခာသယ်ယူရန် ဝင်လာသော မော်တော်ယာဉ်တွေကို စစ်ကောင်စီတပ်ဖွဲ့က ပစ်ခတ်နေမှုကြောင့် ပြည်သူများ မြို့တွင်းကိုမဝင်ရဲကာ ရိက္ခာသယ်ယူခွင့်မရသောကြောင့် စစ်ဘေးရှောင်ပြည်သူများ နောက်လထဲတွင် စားနပ်ရိက္ခာပြတ်လတ်လာဖွယ် အခြေအနေကြုံနေရကြောင်း ထန်တလန်မြို့ စစ်ဘေးရှောင်ကူညီရေးအဖွဲ့က ပြောသည်။
