မြစ်ကြီးနားမြို့ ပမ္မတီးရပ်ကွက်တွင် နေထိုင်သည့် စစ်ရှောင်များသည် စစ်ရှောင်အဖြစ် ၈လကျော် ကြာမြင့်လာပြီဖြစ် သော်လည်း ယနေ့ချိန်ထိ ပြည်နယ်အစိုးရ၏ တရားဝင်စစ်ရှောင်အဖြစ် အသိအမှတ်မခံရသေးကြောင်း ပမ္မတီးရပ်ကွက်တွင် နေထိုင်သည့် ခါနန်စစ်ရှောင်များက ဆိုသည်။

စစ်ရှောင်စခန်း တာဝန်ခံ Slg. Maji Doi Awng (ဆလန် မဂျီဒွဲအောင်) က “တစ်ချို့ တွေကြားနေရတယ် ကျနော်တို့ကို စစ်ရှောင်အတုဆိုပြီး ပြောနေကြတာတွေကို ဆက်ပြီးမလုပ်ပေးဖို့ တောင်းဆိုချင်တယ်။ ဘာဖြစ်လို့လဲဆိုတော့ ကျနော်တို့ကို နမ္မတီးမှာနေတုန်းက အားလုံးထောက်ပံ့ပေးတယ်။ အားလုံး အသိအမှတ်ပြုတယ်။ ခုဒီမှာနေလာနေတဲ့သူတွေက ဟိုကနေ ပြောင်းခဲ့တဲ့လူတွေဘဲ တစ်ခြားလူ မပါဘူးလေ။ ဟိုမှာကျတော့ အစစ်ဖြစ်ပြီး ဒီမှာရောက်မှ ဘယ်လိုအတုဖြစ်သွားရတာလဲ။ ဒါက ကြည့်တာနဲ့တင် သိနိုင်ပါတယ်။”

ခါနန်စစ်ရှောင်ပြည်သူများသည် Kasung (ကဆုန်)၌ တိုက်ပွဲဖြစ်ပွားစဉ် နမ္မတီး ကံလှအသင်းတော်ရှိ စစ်ရှောင်စခန်းသို့ လာရောက်ခိုလှုံသူများဖြစ်သည်။ ယင်းစစ်ရှောင်စခန်းတွင် နေရာအခက်ခဲများရှိသည့်အတွက် မြစ်ကြီးနား ပမ္မတီးရပ်ကွက်သို့ လွန်ခဲ့သည့် ၂၀၁၈ ခုနစ် မတ်လ ၂၁ ရက်ကစပြီး နေထိုင်သူများဖြစ်သည်။

Read more

အစိုးရနှင့် မြန်မာ့တပ်မတော်တို့အနေဖြင့် ပြည်တွင်းငြိမ်းချမ်းရေးကို ရှေးရှုသောအားဖြင့် ရခိုင်ပြည်နယ်တွင် စစ်ဆင်ရေးအတွက် ပို့ထားသောတပ်များကို ရုပ်သိမ်းပြီး ရခိုင့်တပ်မတော်-AAအပေါ် ထိုးစစ်ဆင်နေမှုများကို ချက်ချင်းရပ်ဆိုင်းပေးရန် နိုင်ငံတကာ ကရင်အဖွဲ့အစည်း-IKOက မတ်လ ၂၆ရက် တွင် သဘောထား ထုတ်ပြန်ကာ တောင်းဆိုလိုက်သည်။

အစိုးရ တပ်မတော် အနေဖြင့် AA ကို ထိုးစစ်ဆင် တိုက်ခိုက်မှုများပြုရာတွင် ရခိုင်ပြည်သူ အရပ်သားများ အပေါ် ရည်ရွယ်ချက်ရှိရှိ ပစ်ခတ်တိုက်ခိုက်နေမှုများရှိနေခြင်းကြောင့် IKO အနေဖြင့် အပြင်းအထန် ရှုတ်ချကြောင်း ထုတ်ပြန်ချက်၏ ပြောရေးဆိုခွင့်ရှိသူ စောနစ်ကီက ယခုလို ပြောသည်။

၎င်းက “တပ်မတော်အနေနဲ့ ကျနော်တို့ တိုင်းရင်းသားတွေအပေါ် လက်နက်ကြီးနဲ့ ပစ်ချနေမှုအပေါ် ကျနော်တို့ လက်မခံနိုင်ဘူး။ ဒါက လူ့အခွင့်အရေး ချိုးဖောက်မှုပြုခြင်းပဲဖြစ်တယ်။ ဒါကြောင့် အစိုးရ စစ်တပ်ရဲ့ ထိုးစစ်ဆင် နေမှုတွေ လှုပ်ရှားဆောင်ရွက်မှုတွေကို ကျနော်တို့ IKO အနေနဲ့ ကန့်ကွက်တယ်” ဟု ကေအိုင်စီသို့ ပြောသည်။

မြန်မာပြည်၏ တိုင်းရင်းသား ပြဿနာသည် နိုင်ငံရေး ပြဿနာဖြစ်၍ နိုင်ငံရေးနည်းလမ်းအရ တွေ့ဆုံ ဆွေးနွေး အဖြေရှာခြင်းသည်သာ နည်းလမ်းမှန်ဖြစ်ကြောင်း IKOက ထောက်ပြခဲ့သော်လည်း အစိုးရနှင့် တပ်မတော်ဘက် မှ တိုင်းရင်းသားပြဿနာကို စစ်ရေးနည်းလမ်းဖြင့်သာ အဓိကထား ဖြေရှင်းခဲ့ခြင်းကြောင့် ပြဿနာပြေလည်မှု မရှိလာသည့်အပြင် ပိုမိုရှုပ်ထွေးနက်ရှိုင်း ကြီးထွားလာနေသည်ဟု IKOမှ သုံးသပ်ကြောင်း ထုတ်ပြန်ချက်၌ ဆိုသည်။

အစိုးရတပ်မတော်နှင့် AA တို့အကြားဖြစ်ပွားနေသည့် စစ်ရေးပဋိပက္ခတွင် အရပ်သားပြည်သူများအပေါ် ထိခိုက် မှုများ၊ လူနေအိမ်နှင့် ရှေးဟောင်းအမွေအနှစ်သမိုင်းဝင်စေတီပုထိုးများ ထိခိုက်ပျက်စီးမှုနှင့် ပတ်သက်ပြီး တစ်ဖွဲ့နှင့်တစ်ဖွဲ့အကြား အပြန်အလှန် စွပ်စွဲတုန့်ပြန်ပြောဆိုနေမှုများကို ဒေသတွင်း သတင်း မီဒီယာများမှ အကျယ်တဝင့် ဖော်ပြရေးသားထားသည်ကို တွေ့ရသည်။

ထို့အပြင် လက်ရှိတွင်လည်း ရခိုင်ပြည်နယ်အတွင်း တိုက်ပွဲများဆက်လက်ဖြစ်ပွားလျက်ရှိပြီး ၎င်းစစ်ရေး ပဋိပက္ခများကြောင့် ဒေသခံများကို AA နှင့် ပတ်သက်ဆက်နွယ်မှုများရှိသည်ဟုဆိုကာ တပ်မတော်မှ ဖမ်းဆီးထိန်းသိမ်းမှုများရှိနေသလို ၎င်းတိုက်ပွဲများကြောင့် စစ်ပြေးရှောင် ပြည်သူနှစ်သောင်း ကျော်ခန့်ရှိနေပြီးဟုလည်း ရခိုင် လူမှုအဖွဲ့အစည်းများက ဆိုသည်။

အစိုးရနှင့် တပ်မတော်တို့ ၂၀၁၅ ခုနှစ်က တိုင်းရင်းသား လက်နက်ကိုင်အဖွဲ့များနှင့် တစ်နိုင်ငံလုံး ပစ်ခတ်တိုက် ခိုက်မှု ရပ်စဲရေးသဘောတူစာချုပ်-NCA လက်မှတ်ရေးထိုးချိန်တွင် ကိုးကန့် (MNDAA)၊ တအာင်း(TNLA)နှင့် ရခိုင့်တပ်မတော်(AA)တို့အပေါ် ခွဲခြားဆက်ဆံခြင်းကြောင့် လက်ရှိ ပြည်တွင်း ငြိမ်းချမ်းရေးလုပ်ငန်းစဉ်မှာ ခရီးမ ရောက်ဘဲ ရှေ့ဆက်ရမည့် ငြိမ်းချမ်းရေးဖြစ်စဉ်သည်လည်း ပိုမိုဆိုးဝါးစေမည့် အကြပ်အတည်းနှင့် ရင်ဆိုင်ရနိုင်သည်ဟု IKO၏ ထုတ်ပြန်ချက်၌ အကြံပြုထားသည်။

၎င်းအပြင် အစိုးရနှင့် တပ်မတော်အနေဖြင့် တိုင်းရင်းသားအဖွဲ့အစည်းများအပေါ် ခွဲခြားဆက်ဆံခြင်းမပြုဘဲ ငြိမ်းချမ်းရေး ဆွေးနွေးပွဲတွင် တန်းတူရည်တူပါဝင်နိုင်ရန်အပြင် ULA/AA နှင့် နိုင်ငံရေး ဆွေးနွေးမှု အမြန်ဆုံးပြု လုပ်ရန်လည်း IKO မှ တောင်းဆိုထားသည်။

နိုင်ငံတကာကရင်အဖွဲ့အစည်း-IKO သည် အာရှ-ပစိဖိတ်၊ ဥရောပ၊ မြောက်အမေရိကာ စသည့်နိုင်ငံပေါင်း ၃၀ကျော်မှ ကရင်လူမှုအဖွဲ့အစည်းများဖြင့် ဖွဲ့စည်းထားသော အဖွဲ့ဖြစ်သည်။

ကချင်တိုင်းရင်းသူအမျိုးသမီးငယ်များသည် တရုတ်နိုင်ငံသို့ ‘သတို့သမီးများ’ အဖြစ် ရောင်းစားခံမှုနှင့်ပတ်သက်ပြီး New York အခြေစိုက် Human Rights Watch အဖွဲ့ပြုစုသောအစီရင်ခံစာကို မတ် ၂၅ တနင်္လာနေ့ မြစ်ကြီးနားမြို့တွင် ရှင်းလင်းမှုပြုလုပ်ခဲ့သည်။

လူကုန်ကူးခံရသော ကချင်အမျိုးသမီးများအကြောင်း သုံးနှစ်ကြာ လေ့လာပြုစုထားသည့် “ငါ့တို့ကို ကလေးတစ်ယောက်မွေးပေးရင် မင်းကိုလွတ်ပေးမယ်” ဆိုသောအစီရင်ခံစာ ရှင်းလင်းခြင်း အစီစဉ်ကို HRW က ဦးဆောင်ပြီး Madira Hotel မှာ ပြုလုပ်ခဲ့သည်။

“ငါ့တို့ကို ကလေးတစ်ယောက်မွေးပေးရင် မင်းကိုလွတ်ပေးမယ်” ဟု အမည်ရှိ ဤအစီရင်ခံစာတွင် အဓိကအားဖြင့် ၂၀၁၆ မှ ၂၀၁၈ အတွင်း တရုတ်ပြည်သို့ မယားအဖြစ် ရောင်းစားခံခဲ့ရသော ကချင်အမျိုးသမီး (၃၇) ဦး၏ အကြောင်းအရာများအပြင် ဒုက္ခခံခဲ့ရသူများ၏ မိသားစု ၃စု၊ မြန်မာနိုင်ငံအစိုးရ အရာရှိများ၊ ရဲတပ်ဖွဲ့နှင့် ဒေသန္တရအဖွဲ့များအပြင် အခြားသူများနှင့် တွေ့ဆုံမေးမြန်မှုများပေါ် အခြေခံပြီး ပြုစုထားသည်ဟု အစီရင်ခံစာရေးသားပြုစုသူ Heather Barr က ပြောသည်။

တရုတ်ပြည်သို့ တရုတ်အမျိုးသား၏မယားများအဖြစ်ရောင်းစားခံရသော အမျိုးသမီးများသည် အသက် (၁၈)နှစ်အောက်ဖြစ်ပြီး သူတို့အများစုသည် ကချင်ပြည်နယ်နှင့် ရှမ်းပြည်နယ်မြောက်ပိုင်း စစ်ရှောင်စခန်းများမှဖြစ်ကြကြောင်း ဆိုသည်။

ရောင်းစားခံရသော အမျိုးသမီးများမှာ မိမိကိုယ်တိုင် ငွေကြေးမည်မျှဖြင့် ရောင်းစားခံရသည်ကိုမသိကြဘဲ ကိုယ်ဝန်ရစေရန် ပြုလုပ်ခဲ့ပြီး၊ အစီရင်ခံစာဖော်ပြချက်အရ အမျိုးသမီးတစ်ဦး၏ ခန့်မှန်းချေ အမေရိကန်ဒေါ်လာ ၃၀၀၀ မှ ၁၃၀၀၀ အကြား ညီမျှသာ့်ငွေပမာဏဖြင့် ရောင်းစားခံရသည်ကိုတွေ့ရကြောင်း ဖော်ပြထားသည်။
image.jpeg

မြန်မာ နှင့် တရုတ် နှစ်နိုင်ငံအစိုးရ အာဏာပိုင်များက လူကုန်ကူးခံရသော အမျိုးသမီးများ ပြန်လည်လွတ်မြောက်ရေးအတွက် ကြိုးပမ်းဆောင်ရွက်ရာတွင် ထိရောက်မှုမရှိဘဲ ရောင်းစားခံရသော မိသားစု အချို့က မြန်မာရဲများထံသို့ အကူအညီသွားတောင်းရာ အရေးယူဆောင်ရွက်ပေးလိုပါက ငွေကြေးပေးဆောင်ရမည်ဖြစ်ကြောင်းနှင့် တဖန် တရုတ်ရဲများထံသို့ ထွက်ပြေးလွတ်မြောက်သူများကလည်း လဝက ဥပဒေ ချိုးဖောက်မှုဖြင့် ရောင်းစားခံရသောအမျိုးသမီးများကို ကယ်တင်မည့်အစား ထောင်ချကြောင်းကို အစီရင်ခံစာတွင်ဖော်ပြထားသည်။

လူကုန်ကူးခံရသူများ လွတ်မြောက်ရေးနှင့် ကူညီပေးရေး တို့ကို သက်ဆိုင်ရာ မြန်မာ၊ တရုတ် နှင့် ကချင်လွတ်လပ်ရေးအဖွဲ့ KIO တို့မှ ထိရောက်စွာအရေးယူလုပ်ဆောင်ပေးစေလိုကြောင်း နှင့် လူကုန်ကူးမှုတားဆီးရေးအဖွဲ့များမှလည်း အရေးယူဆောင်ရွက်ခြင်းအပိုင်းကို ပိုမိုထိရောက်စွာ လုပ်ဆောင်စေလိုကြောင်း အစီရင်ခံစာက တောင်းဆိုထားသည်။

လူကုန်ကူးခံရသော စာရင်းနှင့်ပတ်သက်ပြီး လူ့အခွင့်အရေးစောင့်ကြည့်ရေးအဖွဲ့ (Human Rights Watch)၏ မေးခွန်းပေါ် မြန်မာအစိုးရ ပြန်လည်ထူထောင်ရေးဝန်ကြီးဌာန ဖြေကြားချက်အရ ၂၀၁၀ ခုနှစ်အတွင်း ၁၆၄ဦး၊ ၂၀၁၁ ခုနှစ်အတွင်း ၁၃၈ဦး၊ ၂၀၁၂ ခုနှစ်အတွင်း ၁၅၃ဦး၊ ၂၀၁၄ ခုနှစ်အတွင်း ၁၃၄ဦး၊ ၂၀၁၅ ခုနှစ်အတွင်း ၁၀၀ဦး၊ ၂၀၁၆ ခုနှစ်အတွင်း ၁၀၆ဦး၊ ၂၀၁၇ ခုနှစ်အတွင်း ၁၈၁ ဦးနှင့် (၇)နှစ်အတွင်း လူကုန်ကူးခံရသူ စုစုပေါင်း ၁၁၁၅ ဦး ရှိသည်ကိုတွေ့ရသည်။

မွန်ပြည်သစ်ပါတီတပ်ဖွဲ့က မုဒုံမြို့နယ် အဘစ်-ခလယ်တံခွန်တိုင်ကားလမ်းမပေါ်၌ ပြီးခဲ့သည့်သီတင်းပတ်အတွင်း မူးယစ်ဆေးဝါးနှင့် လက်ဝယ်ကိုင်ဆောင်သူ ၈ ဦးတို့အား ဖမ်းဆီးခဲ့သည့်အတွက် မွန်ပြည်နယ်အစိုးရ ကန့်ကွက်စာရေးသားပေးပို့ခဲ့သည့် မိတ္တူတစ်စောင်ကို မွန်သတင်းအေဂျင်စီမှ လက်ခံရရှိခဲ့သည်။

မွန်ပြည်နယ်အစိုးရ၏ ရုံးအမှတ်တံဆိပ်ပါ မတ်လ ၂၂ ရက်စွဲဖြင့် မွန်ပြည်သစ်ပါတီ ဆက်ဆံရေးရုံးသို့ “ကန့်ကွက်ကြောင်း အကြာင်းကြားခြင်းကိစ္စ” စာအရ ယူနီဖောင်းလက်နက်မျိုးစုံ ကိုင်ဆောင်သည့် မွန်ပြည်သစ်တပ်ဖွဲ့ဝင် ၁၅ ဦးမှ အဆိုပါကားလမ်း၌ မော်တော်ယာဉ်/ဆိုင်ကယ်များအား မူးယစ်ဆေးဝါးရှာဖွေစစ်ဆေးခဲ့ရာ စုစုပေါင်း WY စိတ်ကြွဆေးပြား ၄၆၈ ပြားနှင့် ဘိန်းစာရွက် ၄ ပိဿာခန့်ဖမ်းဆီးရမိခဲ့ကြောင်း၊ အောင်ဇော်ထက်ပါ ၈ ဦးအား ကွမ်လှာကျေးရွာအရှေ့ဘက်သို့ ခေါ်ဆောင်သွားကြောင်း ကန့်ကွက်စာတွင်ဖော်ပြထားသည်။

NMSP(မွန်) အဖွဲ့အနေဖြင့် NCA သဘောတူစာချုပ်ပါ သတ်မှတ်နယ်မြေကျော်လွန်၍ လက်နက်ကိုင်ဆောင်သွားလာခွင့်မပြုရေး၊ နယ်ဘက်ဆိုင်ရာကိစ္စရပ်များတွင် ဝင်ရောက်မစွက်ဖက်ရေး၊ ဖမ်းဆီးထားသူများအား ဥပဒေအရ အရေးယူနိုင်ရန် မြန်မာနိုင်ငံရဲတပ်ဖွဲ့ထံသို့ အမြန်အပ်နှံဆောင်ရွက်သွားရန်နှင့် အဆိုပါလုပ်ရပ်အား ကန့်ကွက်ကြောင်း ဝန်ကြီးချုပ်ကိုယ်စား လုံခြုံရေးနှင့် နယ်စပ်ရေးရာဝန်ကြီး ဗိုလ်မှူးကြီး နေထွဋ်ဦးက လက်မှတ်ရေးထိုး ပေးပို့ခဲ့ခြင်း ဖြစ်သည်။

၂၀၁၂ ခုနှစ် ပြည်နယ်/ပြည်ထောင်စုအဆင့် အပစ်ရပ် Bilateral သဘောတူညီချက်အရ ကွမ်လှာကျေးရွာအရှေ့ဘက်ရှိ ကွမ်လှာတော ခန့်မှန်းမြေပုံအမှတ် S-458423 သည် မွန်ပြည်သစ်ပါတီ တပ်ခွဲရုံးနှင့် စိုက်ပျိုးရေး၊ ဖွံ့ဖြိုးရေးရုံးအတွက် သတ်မှတ်ထားပေးသော တပ်တည်နေရာဖြစ်ပြီး အဆိုပါ ကာလမ်းမနှင့် မိုင်အနည်းငယ်သာ ဝေးကွာလျက်ရှိကြောင်း အထက်ပါသဘောတူညီချက်မှတ်တမ်းများတွင် တွေ့ရှိရသည်။

မွန်ပြည်သစ်ပါတီအတွက် အစိုးရနှင့်တပ်မတော်သတ်မှတ်ပေးထားသော တပ်တည်ဧရိယာ ၁၈ နေရာရှိပြီး တပ်တည်တစ်ခုချင်းစီတွင် အချင်းဝက် ၅ မိုင်ပတ်လည်ရှိသော စက်ဝိုင်းသဏ္ဍာန်ဧရိယာရှိကြောင်း မွန်ပြည်သစ်ပါတီခေါင်းဆောင်များထံမှ သိရသည်။

သို့ရာတွင် မွန်ပြည်သစ်ပါတီသည် တစ်နိုင်ငံလုံးပစ်ခတ်တိုက်ခိုက်မှုရပ်စဲရေးသဘောတူစာချုပ် NCA လက်မှတ်ရေးထိုးခဲ့သည်မှာ တစ်နှစ်ကျော်ပြီဖြစ်သော်လည်း ပြည်နယ်/တိုင်းဒေသကြီးအဆင့် ပစ်ခတ်တိုက်ခိုက်မှုရပ်စဲရေးဆိုင်ရာ ပူးတွဲစောင့်ကြည့်ရေးကော်မတီ JMC-S တွင် ပါဝင်နိုင်ခြင်းမရှိသေးကြောင်း တွေ့ရှိရသည်။

မွန်ပြည်နယ် ၁၀ မြို့နယ်မှ လူထုများပါဝင်သော ၂၀၀၈ ဖွဲ့စည်းအုပ်ချုပ်ပုံ အခြေခံဥပဒေပြင်ဆင်ရေး ပြည်သူ့ဆန္ဒထောက်ခံပွဲကို မော်လမြိုင်မြို့၊ သံလွင်ဥယျာဉ်ပန်းခြံ၌ ယမန်နေ့က ကျင်းပခဲ့ရာ လူ ၄၀၀၀ ကျော်ခန့် ပါဝင်လှုပ်ရှားခဲ့ကြောင်း တွေ့ရှိရသည်။

“၂၀၀၈ ဖွဲ့စည်းအုပ်ချုပ်ပုံ အခြေခံဥပဒေပြင်ဆင်ရေး-ဒို့အရေး၊ ပြည်သူ့ဆန္ဒနဲ့ ကိုက်ညီသောအခြေခံဥပဒေများ ရေးဆွဲ ပြဌာန်းရေး-ဒို့အရေး၊ ၂၀၀၈ ဖွဲ့စည်းအုပ်ချုပ်ပုံ အခြေခံဥပဒေပြင်ဆင်ရေး ပူးပေါင်းကော်မတီအဖွဲ့၏ ဆောင်ရွက်ချက်များအား ထောက်ခံမည်” စသည့် ကြွေးကျော်သံများဖြင့် တောင်းဆိုခြင်း ဖြစ်သည်။

“ဖွဲ့စည်းပုံအခြေခံဥပဒေမှာ အခန်း ၈ ခန်းကို ပုဒ်မ ၄၃၆ နဲ့ပိတ်ထားပါတယ်၊ အဲဒီမှာ ဥပဒေပုဒ်မတွေ ၁၀၃ ခုရှိပါတယ်၊ လွှတ်တော်ထဲမှာ ဒီ ၄၃၆ ကြောင့် ၂၅% တပ်မတော်သားတွေ ဝင်ထိုင်လို့ရတာပါ၊ ဒီဥပဒေကိုမပြင်ရင် သူတို့ဆက်ထိုင်နေမှာပဲ၊ ဒီအခြေခံဥပဒေပြင်မှလည်း ပြည်သူအများနဲ့ ဖွဲ့စည်းထားတဲ့အစိုးရတရပ် ပီပြင်စွာ ပေါ်ပေါက်လာမှာပါ” ဟု အောင်ဆန်းကွန်ယက် တွဲဖက်အတွင်းရေးမှူး ဦးခင်မောင်သိန်းက ပြောသည်။

ပုဒ်မ ၄၃၆ သည် ဖွဲ့စည်းအုပ်ချုပ်ပုံ အခြေခံဥပဒေကိုပြင်ဆင်ပါက လွှတ်တော်ကိုယ်စားလှယ် ၇၅ ရာခိုင်နှုန်းနှင့်အထက် သဘောတူပြီး ပြည်လုံးကျွတ်ဆန္ဒခံယူပွဲ ပြုလုပ်ရမည်ဟု အဓိပ္ပါယ်ဖွင့်ဆိုထားသည်။

ရေးမြို့နယ်မှ ထောက်ခံပွဲတက်ရောက်လာသူတစ်ဦးက “ ဒီဖွဲ့စည်းပုံပြင်မယ်ဆိုရင် ကျနော်တို့လူထုက ထောက်ခံမှာပဲ၊ တတ်နိုင်ရင် အသစ်ရေးဆွဲနိုင်ရင် ပိုပြီးတော့ထောက်ခံမယ့်အကြောင်း ပြောချင်လို့ ရေးကနေ မော်လမြိုင်အထိ လာပြီး ကြိုဆိုထောက်ခံပွဲလာတက်တာပါ” ဟု ဆိုသည်။

အလားတူ လူထုထောက်ခံပွဲကို ပြင်ဦးလွင်မြို့၊ လွတ်လပ်ရေးကျောက်တိုင်ကွင်းတွင် ယမန်နေ့ကကျင်းပခဲ့ပြီး “၂၀၀၈ ဖွဲ့စည်းပုံ အလိုမရှိ၊ ဒီမိုကရေစီ ဖက်ဒရယ်စနစ် ပေါ်ပေါက်ရေး အခြေခံဥပဒပြင်ဆင်ပေး၊ တိုင်းရင်းသား ပြည်သူခွင့်တူညီမျှရရှိရေး ဖွဲ့စည်းပုံပြင်ဆင်ပေး” စသည်အချက်တွေကို ဒေသခံ တစ်ထောင်ခန့်က တောင်းဆိုခဲ့ကြောင်း သတင်းရရှိသည်။