ငြိမ်းချမ်းရေးနှင့် ပဋိပက္ခဆိုင်ရာ သုတေသီ လူငယ်အမျိုးသမီး နန်းခွမ်လိတ်နှင့် အမေးအဖြေ
၂၈ ဇွန် ၂၀၂၂
အာဏာသိမ်းစစ်ခေါင်းဆောင် ဗိုလ်ချုပ်မှူးကြီးမင်းအောင်လှိုင် ဖိတ်ခေါ်တဲ့ တိုင်းရင်းသားလက်နက်ကိုင်တပ်ဖွဲ့နဲ့ ငြိမ်းချမ်းရေးဆွေးနွေးပွဲကို မေ (၂၀) ရက်ကစတင်ပြီး လက်နက်ကိုင်တပ်ဖွဲ့ တစ်ဖွဲ့ချင်းစီနဲ့ ဆွေးနွေးမှုတွေ ပြုလုပ်နေပါတယ်။ ဒီလိုစစ်အုပ်စုရဲ့ ငြိမ်းချမ်းရေးခေါင်းစဉ်တပ်ကာ ဟန်ပြဆွေးနွေးပွဲတွေနဲ့ ပတ်သက်ပြီး ငြိမ်းချမ်းရေးနဲ့ ပဋိပက္ခဆိုင်ရာ လုပ်ငန်းစဉ်တွေ၊ ဖြစ်စဉ်တွေအပေါ် သုတေသနပြုလုပ်နေသူ လူငယ်အမျိုးသမီး နန်းခွမ်လိတ်နဲ့ ဆက်သွယ်မေးမြန်းထားပါတယ်။
နန်းခွမ်လိတ်ဟာ သြစတြေလျနိုင်ငံ University of Sydney မှာ ငြိမ်းချမ်းရေးနဲ့ ပဋိပက္ခဆိုင်ရာ ဘာသာရပ်ကို လေ့လာခဲ့သူဖြစ်ပြပါတယ်။ ဒါ့အပြင် ရှမ်းပြည်နယ်မြောက်ပိုင်းဒေသရှိ စစ်ဘေးရှောင်ပြည်သူတွေအတွက် ကာကွယ်စောင့်ရှောက်ရေးလုပ်ငန်းတွေကို သုံးနှစ်ခန့် ကူညီလုပ်ကိုင်ခဲ့သူလည်း ဖြစ်ပါတယ်။
မေး – လက်ရှိ စကစ က တိုင်းရင်းသား လက်နက်ကိုင်တပ်ဖွဲ့တွေနဲ့ ငြိမ်းချမ်းရေးဆွေးနွေးပွဲမှာ အစ်မအနေနဲ့ ဘယ်လိုမြင်ပါသလဲရှင့်။
ဖြေ – လက်ရှိ အခင်းအကျင်းမှာ တစ်နိုင်ငံလုံးအတိုင်းအတာနဲ့ ကြည့်ရမယ်ဆိုလို့ရှိရင် နိုင်ငံရေး အကြပ်အတည်းတွေ တိုက်ပွဲတွေလည်း အများကြီးဖြစ်တယ်။ လက်ရှိအခြေနေမှာ ကျမအနေနဲ့ ငြိမ်းချမ်းရေးဆိုတဲ့ စကားလုံးကို နားလည်ထားတဲ့ နားလည်မှုအရဆိုလို့ရှိရင် ပထမဦးဆုံး ပြောချင်တာကတော့ ငြိမ်းချမ်းရေး ဆွေးနွေးပွဲ ပြောလို့မရဘူး။
ဒါကတော့ စကစ ရယ် ပြီးတော့မှ အခြားတိုင်းရင်းသားတော်လှန်ရေး အင်အားစုအချို့တွေနဲ့ တွေ့ဆုံမှု သပ်သပ်ပဲ။ ငြိမ်းချမ်းရေးအတွက်လည်း အဓိပ္ပာယ်ရှိတဲ့ တွေ့ဆုံမှုတော့ မမြင်ဘူး။ လက်ရှိအခင်းအကျင်းမှာ တစ်နိုင်ငံလုံးက ဒုက္ခရောက်နေတယ်။ အကြပ်အတည်း ကျရောက်နေချိန်ဖြစ်တယ်။ တင်းမာမှုတွေလည်းရှိနေတော့ ဒီငြိမ်းချမ်းရေးဆွေးနွေးပွဲက ဘယ်လိုဖြစ်နိုင်မလဲဆိုတဲ့ဟာတော့ မေးခွန်း ထုတ်စရာပေါ့နော်။ သက်ဆိုင်တဲ့ အစုအဖွဲ့ အဖွဲ့အစည်းတွေလည်း ပါဝင်တာမရှိဘူး။ စကစ အနေနဲ့ သူဖိတ်ခေါ်တာကတော့ တိုင်းရင်းသား တော်လှန်ရေးအင်အားစုအကုန်လုံး EAOs အကုန်လုံးတွေကိုတော့ ဖိတ်တယ်။ ဒါပေမယ့် NUG နဲ့ PDF တွေက လွဲလို့ပေါ့။ ဒါက သူ့ရဲ့ ဖိတ်ကြားချက်။
မေး – တကယ့် စစ်မှန်တဲ့ ငြိမ်းချမ်းရေးလို့မြင်ပါသလားရှင့်။
ဖြေ – တကယ်စစ်မှန်တဲ့ ငြိမ်းချမ်းရေး ဆိုလို့ရှိရင်တော့ အဓိက စစ်မှန်တဲ့ စိတ်ရင်း စေတနာက အဓိက ပေ့ါနော်။ စစ်မှန်တဲ့ ငြိမ်းချမ်းရေး တကယ်မျှော်ကိုးပြီးတော့မှ အဓိပ္ပာယ်ရှိတဲ့ တွေ့ဆုံမှုမျိုးဖြစ်ရမယ်။ ပါဝင်သင့် ပါဝင်ထိုက်တဲ့အဖွဲ့အစည်း အစုအဖွဲ့တွေ အင်အားစုတွေ အကုန်လုံး ပါမှပဲ ဒါက စစ်မှန်တဲ့ ငြိမ်းချမ်းရေး တွေ့ဆုံမှုလို့ ပြောလို့ရတယ်။ ပွင့်လင်းမြင်သာမှုလည်း ရှိရမယ်။ ကိုယ်စားပြုမှု ပွင့်လင်းမြင်သာမှု စသဖြင့် ဒီလိုမျိုး တွေ့ဆုံမှုတွေရှိမှ စိတ်ရင်းစေတနာပါတဲ့ တွေ့ဆုံမှုဖြစ်မှပဲ အစုအဖွဲ့အကုန်လုံးပါတဲ့ တွေ့ဆုံပွဲတွေဖြစ်မှပဲ စစ်မှန်တဲ့ ငြိမ်းချမ်းရေးကို ဦးတည်စေမယ့် တွေ့ဆုံမှုတွေ ဖြစ်နိုင်မယ်လို့တော့ ကျမမြင်တယ်။ နောက်တစ်ခုက အတွေ့အကြုံအရတော့ စစ်မှန်တဲ့ ငြိမ်းချမ်းရေးမဟုတ်ဘူး။ ခေတ်အဆက်ဆက် အတွေ့အကြုံအရ ဆိုလို့ရှိရင်တော့ ဒီလိုနိုင်ငံရေး စစ်ရေးအကြပ်အတည်း ရောက်ပြီဆိုလို့ရှိရင် ငြိမ်းချမ်းရေး နာမည်တပ်ပြီးတော့မှ အဖွဲ့အစည်းတွေကို ခေါ်တွေ့တာ ဒီတစ်ကြိမ်မှ မဟုတ်ဘူး။ အရင်ကလည်း တောက်လျောက်ဖြစ်ခဲ့တယ်။ တော်တော်များများကတော့ နိုင်ငံရေး ပရိယာယ်သုံးနေကျ အခုမှ သုံးတဲ့ ဗျူဟာသစ်တော့မဟုတ်ဘူး။ ဒါက အရင်တုန်းက သွားတဲ့ပုံစံအတိုင်းပဲလေ။
တွေ့ဆုံဆွေးနွေးတယ်ဆိုတာ အကြပ်အတည်းကာလ ဖြစ်တယ်။ သူ့ရဲ့ နိုင်ငံရေးထွက်ပေါက် စစ်ရေးထွက်ပေါက်ပဲပြောပြော ဒါမှမဟုတ် တော်လှန်ရေးအင်အားစုတွေ အရမ်းကြီးစုစည်း မသွားအောင် ဆိုတဲ့ပုံစံမျိုးနဲ့ သူ့အတွက် နိုင်ငံရေး အကျိုးအမြတ်အရ အတွက်ပဲ ခေါ်ယူတွေ့ဆုံတဲ့ ဆွေးနွေးပွဲဖြစ်တယ်။ ငြိမ်းချမ်းရေးကို တကယ်တမ်း မျှော်ကိုးလိုလားတဲ့ ဆွေးနွေးပွဲတော့ မဟုတ်ဘူး။ အဲ့လိုတော့ ပြောလို့ရပါတယ်။
မေး – တစ်ဖွဲ့ချင်း ခေါ်ယူပြီး ဆွေးနွေးတဲ့အပေါ်မှာကော ပွင့်လင်းမြင်သာတဲ့ ငြိမ်းချမ်းရေး ဆွေးနွေးပွဲဖြစ်နိုင်မယ်လို့ ထင်လား။
ဖြေ – တစ်ဖွဲ့ချင်းဆီ ခေါ်ယူတယ်ဆိုတာက သေချာတယ်၊ ပွင့်လင်းမြင်သာမှုမရှိတဲ့ ဆွေးနွေးချက်တွေ အမှန်ပဲ။ ဘာလို့လဲဆို သူတို့ ဆွေးနွေးတာတွေတော့ ပြီးသွားပြီ မီဒီယာတွေ ပြောပြချက်အရပဲ ယေဘုယျဆန်ဆန် ဆွေးနွေးချက်တွေပဲ ကြားသိရတယ်။ အမှန်တော့ အားလုံးပါဝင်တဲ့ ဆွေးနွေးပွဲပုံစံ ဖြစ်ရမယ်။ အခုလို တစ်ဖွဲ့ချင်း ဆီဆိုတာထက် တိုင်းရင်းသားတော်လှန်ရေးအင်အားစုတွေ စုစုစည်းစည်း နဲ့ သွားတွေ့တဲ့ ပုံစံမျိုးဆိုလို့ရှိရင်တော့ ပိုပြီးထိရောက်တဲ့ ဆွေးနွေးပွဲမျိုးဖြစ်တာပေါ့။
အခုဟာက တစ်ဖွဲ့ဆီ ခွဲပြီးတွေ့တာကျတော့ ခွဲထုတ်တဲ့ ဗျူဟာ တစ်ခုဖြစ်မလား။ တော်လှန်ရေး အင်အားစုတွေကြား စုစုစည်းစည်းမဖြစ်အောင် နောက်တစ်ခုကျတော့ ဆွေးနွေးပွဲကို စကစ အနေနဲ့ သူက တစ်ဖက်ပေါ့။ တစ်ဖက်ကတော့ တိုင်းရင်းသား အင်အားစုတွေအနေနဲ့ စုစုစည်းစည်း တစ်ဖွဲ့အနေနဲ့ တွေ့မယ်ဆိုလို့ရှိရင်တော့ ဆွေးနွေးပွဲရဲ့ သဘောသဘာဝဆိုတော့ power balance သူ့ဘက်က အပေါ်စီးကနေပြီး ဆွေးနွေးလို့ မရနိုင်တဲ့အခြေနေများ ဖြစ်နေမလားဆိုတဲ့ ပုံစံမျိုးလည်း သူစဥ်းစားမယ်ထင်တယ်။ အဲ့ဒီတစ်ချက်တွေ့တယ်။ အပေါ်စီးကနေ ဆွေးနွေးညှိနှိုင်းနိုင်ဖို့ ဖြစ်နိုင်တယ်။
တစ်ဖွဲ့ချင်းဆီ ဒီလိုခွဲထုတ်တယ်ဆိုတဲ့ဟာလည်း ဒီလိုတော်လှန်ရေး အင်အားစုတွေကြား သွေးကွဲနိုင်တယ်။ တစ်ဖွဲ့က ဘာသွားဆွေးနွေးတာလဲ။ ပြီးရင် နောက်တစ်ဖွဲ့က သံသယဝင်နိုင်တယ်။ ခွဲပြီးတွေ့တာက ဒါသွေးခွဲစေတဲ့ တက်ရောက်မှုတွေလည်း အများကြီးတွေ့နိုင်တယ်။ ငြိမ်းချမ်းရေး ဆိုလို့ရှိရင်တော့ အားလုံးနဲ့ သက်ဆိုင်တဲ့ အရေး ပြည်သူတွေ အားလုံး သက်ဆိုင်တဲ့အရေး အခုလို တစ်ဖွဲ့ချင်းဆီ ခေါ်ယူတာက သွေးကွဲစေရုံမကဘူး သူတို့ သွားဆွေးနွေးတဲ့အကြောင်းအရာကို ဒီနှစ်ဦး နှစ်ဖွဲ့ကြားထဲမှာပဲ သိတယ်။ ဒါပေမယ့်လည်း ဆွေးနွေးတဲ့အရေးတွေက အားလုံးနဲ့ သက်ဆိုင်တဲ့အရေး ပြီးရင် ငြိမ်းချမ်းရေးဆိုတဲ့ဟာလည်း အမည်ခံတယ်ဆိုတော့ ဒါကတော့ ပွင့်လင်းမြင်သာမှု နဲ့ ပတ်သက်လာလို့ရှိရင် မေးခွန်းထုတ်စရာလည်းရှိတယ်။
မေး – လက်ရှိ နိုင်ငံရေး ရှုပ်ထွေးနေတဲ့ အချိန်ကာလမှာ ဒီလို လက်နက်ကိုင်တပ်ဖွဲ့တွေက လက်ခံပြီး စကစနဲ့ ငြိမ်းချမ်းရေး စကားသွားပြောတာဟာ သင့်လျော်တဲ့ အချိန်ဖြစ်တယ်လို့ ထင်ပါသလားရှင့်။
ဖြေ – အရင်ဦးဆုံးကတော့ တိုင်းရင်းသား တော်လှန်ရေး အင်အားစုအနေနဲ့ သွားတွေ့တယ်ဆိုတဲ့ဟာက သင့်လျော်တဲ့အချိန်ဆိုတာ ဘယ်သူ့အတွက် သင့်လျော်တဲ့အချိန်လဲ။ တစ်နိုင်ငံလုံး အတိုင်းအတာနဲ့ ပြောရမယ်ဆိုရင် တိုက်ပွဲတွေလည်းဖြစ်နေတယ်။ ပြီးတော့မှ သူ့ကို ဆန့်ကျင်တာကလည်း တစ်ပြည်လုံး အတိုင်းအတာ နဲ့ ဖြစ်နေတယ်ဆိုတော့ သူ့အနေနဲ့ စစ်မျက်နှာပြင်ကို လျော့ချချင်တယ်။ နေရာတိုင်းမှာ ရန်သူတွေက ဝိုင်းနေမယ်ဆိုရင်လည်း အဆင်မပြေဘူး။ စစ်မျက်မှာပြင် လျော့ချတဲ့ အနေနဲ့ တိုင်းရင်းသား တော်လှန်ရေး အင်အားစုတွေကို ခွဲထုတ်တာ စုစုစည်းစည်း မဖြစ်သွားအောင်ဆိုတဲ့ ရည်ရွယ်ချက်ရယ်၊ တော်လှန်ရေးအင်အားစု အဖွဲ့တိုင်းရဲ့ စစ်မျက်နှာပြင် မဖြစ်ချင်တာရယ်၊ နောက်တစ်ခု ပိုအရေးကြီးတာက စစ်တပ်အတွက် တရားဝင်မှုက အရေးကြီးတယ်။
အဓိက စကစ ရဲ့ ရည်ရွယ်ချက်ကလည်း ဒီတိုင်းရင်းသားတော်လှန်ရေးအင်အားစုနဲ့ တခြားပြည်မအင်အားစုတွေ NUG တို့ PDF တို့နဲ့ပဲဖြစ်ဖြစ် အချင်းချင်းကြားမှာ ချိတ်ဆက်မှု စုစည်းမှုတွေကို မစုစည်းစေချင်ဘူး။ သွေးခွဲစေချင်တာလည်း ပါတယ်။ ဆွေးနွေးပွဲကလည်း သူ့ရဲ့ ရည်မှန်းချက်တစ်ခုပါ။ သွားတွေ့တယ်ဆိုတာကလည်း သူ့ရဲ့ ရည်မှန်းချက်ကို အထမြောက်အောင် လုပ်ပေးသလို ဖြစ်သွားတယ်။ ဒါကလည်း တော်လှန်ရေး အင်အားစုတွေအတွက် နစ်နာတယ်။ နိုင်ငံရေးအရ နစ်နာချက်။ တော်လှန်ရေး အင်အားစု တစ်စုံလုံးကတော့ သင့်တော်တဲ့အချိန်မဟုတ်ဘူး။ အခြေနေအရ သွားတွေ့တဲ့ပုံစံအရကော အချိန်ကောင်းမဟုတ်ဘူးလို့ မြင်ပါတယ်။
မေး – လက်နက်ကိုင်တပ်ဖွဲ့တွေက ပြည်နယ်တွေ ကိုယ်စီတောင်းတဲ့အပေါ်ရော ဘယ်လိုမြင်ပါသလဲ။
ဖြေ – သက်ဆိုင်ရာ အဖွဲ့အစည်းတွေရဲ့ စဥ်းစားချက်ကိုတော့ မပြောတတ်ဘူး။ ပြည်နယ်ကိစ္စပဲဖြစ်ဖြစ် ကိုယ်ပိုင် ပြဌာန်းခွင့်ပဲဖြစ်ဖြစ် ကျမတို့ တိုင်းရင်းသား အင်အားစုတွေအားလုံး ဘယ်လူမျိုးစုမဆို တိုင်းရင်းသားမဆို ကျမတို့ အားလုံးလိုချင်တဲ့ ကိုယ်ပိုင်ပြဌာန်းခွင့် ကိုယ့်ကံကြမ္မာကို ဖန်တီးခွင့် ဒါပေမယ့် ကျမတို့ရဲ့ ဦးတည်ချက် က ဘယ်လိုပုံစံမျိုးနဲ့ လိုချင်ကြတာလဲ ကိုယ့်ပြည်နယ်လား ဒါမှမဟုတ် ကိုယ်ပိုင်ပြဌာန်းတဲ့ နယ်မြေပုံစံမျိုးနဲ့လား။ ဘယ်လို ပုံစံမျိုးနဲ့လည်း ဆိုတာက တစ်ဖွဲ့နဲ့ တစ်ဖွဲ့ကတော့ မတူကြဘူး။
ဒါကတော့ ပြောကြမှာပဲ ကိုယ်လိုချင်တဲ့ ဦးတည်ချက် (position) စကစနဲ့ သွားပြောတဲ့ဆိုတဲ့ဟာကလည်း သူတို့ရဲ့ စဥ်းစားချက်အရ စကစ ကိုပြောမှပဲ ရနိုင်တယ်ဆိုတဲ့အမြင် ရှိသလား၊ ဒါမှမဟုတ် မရှိဘူးလားဆိုတာ မပြောတတ်ဘူး။ ပြည်နယ်အသစ်ပဲဖြစ်ဖြစ် ကိုယ်ပိုင်ပြဌာန်းခွင့်ပဲဖြစ်ဖြစ် တောင်းမှရတယ်ဆိုတဲ့အမြင်လည်း လက်တွေ့ကျတဲ့ အမြင်ဖြစ်ပါမလားဆိုတဲ့ဟာပေါ့နော်။ သက်ဆိုင်ရာ အရင်ဦးဆုံး စကစ ကို သွားပြောတယ်ဆိုတဲ့ဟာက ဒီတိုင်း သူတို့ရဲ့ position သူတို့ရဲ့ မျှော်မှန်းချက်ကို ဒီတိုင်းချပြတာလောက်ပဲ ဖြစ်မယ်ထင်တယ်။
တကယ်လက်တွေ့အကောင်အထည်ဖော်နိုင်ဖို့ဆိုလို့ရှိရင် စကစ တစ်ခုတည်းမပြီးဘူး။ ဒီလိုမျိုးသွားပြီး ချပြတာကလည်း သက်ဆိုင်ရာ အဖွဲ့အစည်းအနေနဲ့ ချပြတဲ့ ပုံစံမျိုးနဲ့ပဲ ဖြစ်ရင်လည်း ဖြစ်နိုင်တာပေါ့နော်။ စကစ က ပေးမှ ရနိုင်တဲ့ ပုံစံမျိုးနဲ့ သွားပြောရင်လည်း တကယ်တမ်းရော စကစ နေပြီးမှ ပေးနိုင်မယ့် အာဏာ ဆုံးဖြတ်ခွင့်အာဏာ တကယ်တမ်းရှိလား။ တကယ်လို့ စကစဆီက တောင်းဆိုတဲ့ ပုံစံမျိုး သူက ပေးမှ ရတယ်ဆိုတဲ့ ပုံစံမျိုးဆိုရင်တော့ ကျမအနေနဲ့ မြင်တာက လက်တွေ့တော့ မဆန်ဘူး။ အားလုံးပါဝင်ပြီး ကျေကျေလည်လည်ဆွေးနွေးပြီးတော့မှ အားလုံးလက်ခံနိုင်တဲ့ ပုံစံမျိုးသွားမှပဲ တကယ့်လက်တွေ့ဆန်တဲ့အဖြေ လက်တွေ့ဆန်တဲ့ပုံစံ ကျမတို့ မြင်ချင်တဲ့ ဖက်ဒရယ်ပဲ ပြောပြော အဲ့လိုပုံစံ သွားနိုင်မယ် ပုံဖော်နိုင်မယ် ရနိုင်မယ်လို့တော့ မြင်တယ်။
မေး – နောက်ဆုံးအနေနဲ့ စစ်ရေး နိုင်ငံရေးနဲ့ ပတ်သက်ပြီးတော့ရော ဘာများ ဖြည့်စွက်ပြောချင်ပါသလဲ။လက်ရှိ ငြိမ်းချမ်းရေးဆွေးနွေးပွဲမှာ အားလုံးမပါဝင်တဲ့ အပေါ်ကော ဘာပြောချင်ပါသလဲ။
ဖြေ – စစ်ရေးပဲပြောပြော၊ နိုင်ငံရေးပဲ ပြောပြော လက်နက်ကိုင်မှ တော်လှန်တာမဟုတ်ဘူး။ တခြားပုံစံမျိုးနဲ့ တော်လှန်တာလည်းရှိတယ်။ လက်နက်ကိုင်တော်လှန်ရေးက အခြေနေအကြောင်းအမျိုးမျိုးကြောင့် ပိုပြီးတော့မှ အားသာနေတယ်။ တော်လှန်ရေး အင်အားစုတွေအနေနဲ့ စုစုစည်းစည်းဖြစ်ဖို့ရယ် အဓိကတော့ ကိုယ့်ရဲ့ တော်လှန်ရေး ရဲ့ ရည်ရွယ်ချက်ကို မျက်ခြေမပျက်ဖို့ ၊ တော်လှန်ရေးကို အကောင်အထည်ဖော်တဲ့နေရာမှာဆိုရင် ကျင့်ဝတ်ပိုင်းအရ၊ ဗျူဟာပိုင်းအရ မှန်ကန်တဲ့ လမ်းစဥ်ဖြစ်ဖို့ လိုတယ်။ ဘက်မှားမယူမိစေဖို့ လိုတယ်။ အဲ့ဒါလည်း အရေးကြီးတယ်။ စစ်ရေး ဗျူဟာအရ တကယ်လို့ ဘက်မှား ယူမိတယ်ဆိုလို့ရှိရင် သမိုင်းမှာက ကျရှုံးတဲ့ သမိုင်းရောက်သွားနိုင်တယ်။
တော်လှန်ရေးက လူထုတွေရဲ့ ထောက်ခံမှု ပါဝင်မှုမရှိဘူးဆိုလို့ရှိရင်တော့ တော်လှန်ရေးက ရှေ့မရောက်ဘူး။ မအောင်မြင်နိုင်ဘူး။ အာဏာရှင်တစ်ခု ပြုတ်ကျသွားရင်တောင်မှ အာဏာရှင်နောက်တစ်ခု ဖြစ်လာနိုင်တယ်။ တော်လှန်ရေးရဲ့ တကယ့် အဓိက ရည်ရွယ်ချက် ရည်မှန်းချက်ကို မျက်ခြေမပျက်ဖို့ ဆိုတော့ အဓိက ကတော့ ကျမတို့ အာဏာရှင်ကို ဖြုတ်ချချင်တာ တန်းတူရေး စသဖြင့် ဒါတွေ ကျမတို့ ဒီစနစ်ကို လိုချင်တယ်။ အာဏာရှင်ဆန်တဲ့ စနစ်ကို ဖြိုဖျက်ချင်တာ အဲ့ဒါကို မျက်ခြေမဖျက်ဖို့ အာဏာရှင်တစ်ခု ဖြုတ်ချသွားရင် အာဏာရှင် ပုံစံမျိုးနဲ့ မသွားဖို့ တော်လှန်ရေးကိုလည်း အာဏာရှင် ပုံစံတော်လှန်ရေးမလုပ်ဖို့ ဆိုတဲ့ဟာ လူငယ်တွေရဲ့ အသံနားထောင်ဖို့ သူတို့ အင်အားကို အခွင့်ကောင်းယူပြီး အသုံးချတတ်ဖို့တော့ လိုမယ်လို့ မြင်ပါတယ်။
ငြိမ်းချမ်းရေးဆွေးနွေးပွဲက တကယ်တမ်းစစ်မှန်တဲ့ ငြိမ်းချမ်းရေးကို မျှော်ကိုးပြီးတော့ သွားချင်တယ်ဆိုလို့ရှိရင်တော့ အားလုံးပါဝင်တဲ့ အထူးသဖြင့် သက်ဆိုင်တဲ့ အစုအဖွဲ့ တွေအကုန်လုံး ပါဝင်တဲ့ ဆွေးနွေးညှိနှိုင်းမှုမျိုး ဖြစ်ရမယ်။ အဲ့လိုမျိုးဖြစ်ဖို့က အဓိက အရေးကြီးတာက စစ်မှန်တဲ့ စိတ်ရင်း စေတနာဖြစ်ဖို့ လိုတာပေါ့နော်။
သျှမ်းသံတော်ဆင့် – ပေးပို့သည်။